Rrëzimi tragjik i avionit Boeing 787 të kompanisë Air India, më 12 qershor, që shkaktoi 260 viktima, ka marrë një kthesë edhe më të dhimbshme për familjarët e të ndjerëve. Gabime në procesin e identifikimit dhe riatdhesimit të trupave kanë lënë shumë prej tyre në pasiguri të plotë dhe pa mundësinë për të vajtuar të dashurit siç duhet.

Sipas tabloidit britanik “Daily Mail”, trupat e disa prej pasagjerëve u identifikuan gabimisht, ndërsa në disa raste, mbetjet e personave të ndryshëm janë përzier dhe vendosur në të njëjtin arkivol. Situata është përshkruar si “e tmerrshme dhe shqetësuese”, ndërsa testet e ADN-së kanë zbuluar devijime të rënda në identifikim, duke e bërë të pamundur për disa familje të mbajnë ceremonitë mortore.

Një prej figurave që ka denoncuar publikisht këtë skandal është mjekja ligjore Fiona Wilcox, e cila, duke analizuar mostrat e ADN-së të viktimave britanike, zbuloi se ato nuk përputheshin me të dhënat e ofruara nga familjet.

Nga viktimat e aksidentit, 52 ishin shtetas britanikë, ndërsa pjesa tjetër përbëhej nga pasagjerë të kombësive të ndryshme. Disa trupa janë djegur apo varrosur në Indi, ndërsa vetëm një pjesë janë riatdhesuar në Mbretërinë e Bashkuar, ndonëse me dyshime të forta për përmbajtjen reale të arkivoleve.

Në sfondin e kësaj tragjedie, një hetim i nivelit të lartë është hapur si në Londër ashtu edhe në Indi, për të hedhur dritë mbi gabimet fatale në menaxhimin e trupave pas aksidentit. Kryeministri britanik Keir Starmer pritet të diskutojë drejtpërdrejt me homologun indian, Narendra Modi, gjatë një vizite shtetërore këtë javë.

Avokati Healy-Pratt, që përfaqëson disa prej familjeve britanike, ka ngritur alarmin: “Disa prej tyre kanë marrë eshtrat e gabuara, dhe janë në një gjendje të thellë tronditjeje. Kjo ka ndodhur prej javësh dhe nuk ka asnjë shpjegim zyrtar. Këto familje meritojnë të dinë të vërtetën”.

Ai po rindërton hap pas hapi të gjithë zinxhirin e ngjarjeve që nga nxjerrja e trupave nga rrënojat, deri në dërgimin e tyre jashtë Indisë – në një përpjekje për të zbuluar jo vetëm gabimet logjistike, por edhe papërgjegjshmërinë sistematike që ka rënduar mbi dhimbjen e familjeve.

Tragjedia e 12 qershorit duket se ka lënë plagë të hapura jo vetëm nga humbja, por edhe nga mungesa e dinjitetit në trajtimin e viktimave pas vdekjes.