Kontrolli i Lartë i Shtetit ka ngritur akuza të rënda ndaj qeverisë Rama, duke bërë të ditur se 38 miliardë lekë ose 370 milionë euro janë detyrime të shtetit ndaj kontratave të investimeve që duhen paguar pas vitit 2024. Sipas KLSH, zhvillimi i tenderave për investime publike pa miratimin paraprak të Ministrisë së Financave po shndërrohet në veprimtari të errët, duke rritur shanset për shpërdorimin e taksave të shqiptarëve, humbjen e efektivitetit të tyre dhe rritjen e barrës së detyrimeve të buxhetit në avancë.

Auditimi i KLSH-së në Ministrinë e Financave ka zbuluar se të paktën 38 miliardë lekë (370 milionë euro) janë detyrime të prapambetura ndaj kontratave të investimeve, të cilat do të paguhen pas vitit 2024. Disa projekte kanë përfunduar punimet, por financimet duket se do të vazhdojnë deri në fund të dekadës së ardhshme.

Rruga Kardhiq – Delvinë, me një kosto totale prej 14.2 miliardë lekësh, do të përfundojë vitin e ardhshëm, por 22% e kësaj shume, ose 3.1 miliardë lekë, do të paguhen pas vitit 2024. Projekti “Unaza e re e Tiranës”, me një kosto prej 35.6 miliardë lekësh, do të ketë rreth 40% të shumës së pagesës pas vitit 2024.

Inspektorët e KLSH-së kanë konfirmuar se entet publike fillojnë procedurat e prokurimit pa miratimin e mëparshëm nga Ministria e Financave dhe Ekonomisë, duke marrë angazhime buxhetore pa disponuar fondet e nevojshme. Kjo sjellë në krijimin e detyrimeve të prapambetura dhe rritjen e borxhit publik, duke shkelur kufijtë e miratuar për shpenzimet aktuale dhe ato për vitet e ardhshme buxhetore.