Rasti i Dorjan Pukës, një shtetas shqiptar me precedentë të shumtë penalë në Britaninë e Madhe, ka shkaktuar një debat të ashpër në politikën britanike. Puka, i njohur për aktivitetet e tij kriminale dhe dënimet për vjedhje, ka rikthyer vëmendjen mbi çështjen e emigrantëve, duke u bërë temë e kritikave nga figura të njohura politike. Javën e kaluar, më 10 tetor, ish-lideri i partisë së ekstremit të djathtë UKIP, Nigel Farage, shfrytëzoi një dalje televizive për të sulmuar emigrantët, duke përmendur veçanërisht shqiptarët si një kontingjent problematik.

Farage denoncoi rastin e Pukës, i cili, pavarësisht se ishte dënuar dy herë në Britani, kishte arritur të rikthehej në vend dhe të aplikonte për azil. Farage e cilësoi këtë si një shembull të politikave të dështuara të emigracionit, duke theksuar se kriminelët, si Puka, po përfitonin nga sistemet ligjore për të shmangur ekstradimin. Home Office, në një deklaratë, konfirmoi se çështja e Pukës ishte ende në proces dhe nuk mund të favorizohej asnjëra palë përpara marrjes së një vendimi përfundimtar.

Ferrari 300 mijë paund dhe zemërimi i publikut

Tensionet u shtuan më tej kur Farage publikoi një video në rrjetet sociale, ku Dorjan Puka shihej duke shëtitur me një makinë luksoze Ferrari me vlerë 300 mijë paund. Kjo pamje provokoi reagime të shumta në Britani, me Farage që deklaroi se “kriminelët po bënin ligjin” dhe se sistemi britanik i emigracionit po dështonte në mbrojtjen e interesave të qytetarëve britanikë.

Farage, një figurë e njohur për rolin e tij si nismëtar i lëvizjes për Brexit, ka qenë një nga zërat më të ashpër kundër emigracionit të paligjshëm, duke e përdorur këtë çështje për të ngritur debatet rreth kontrollit të kufijve dhe ndikimit të emigrantëve në shoqërinë britanike. Rasti i Pukës është vetëm një shembull në sytë e tij për problemet më të gjera që ai e sheh në politikat e emigracionit të Britanisë së Madhe.