Qytetarët që duan të përfitojnë një pension minimal në Shqipëri duhet të kenë minimumi 15 vite punë të deklaruar, ndërsa për të marrë një pension të plotë kërkohen plot 38 vite pune. Zëvendësministrja e Ekonomisë, Kulturës dhe Inovacionit, Olta Manjani, sqaroi këtë skemë gjatë një diskutimi, duke nënvizuar gjithashtu se rritja e jetëgjatësisë është një faktor që po ndikon në skemën e pensioneve.

Sipas Manjanit, rritja e jetëgjatësisë është një lajm pozitiv që pasqyron përmirësimin e kushteve të jetesës dhe standardeve ekonomike, por njëkohësisht, kjo tendencë rrit presionin mbi skemën e pensioneve. “Një faktor i rëndësishëm dhe pozitiv është rritja e jetëgjatësisë. Fatmirësisht, kjo rritje që lidhet me përmirësimin e standardeve të jetesës çon në gëzimin për një kohë më të gjatë të pensioneve. Ne urojmë që jetëgjatësia të vazhdojë të rritet, edhe pse kjo rëndon mbi skemën e pensioneve,” u shpreh ajo.

Zëvendësministrja gjithashtu përmendi raportin aktual mes kontribuuesve dhe pensionistëve, duke vënë në dukje se aktualisht ka 1.19 kontribuues për çdo pensionist, një tregues që flet për balancën e brishtë të sistemit të pensioneve në Shqipëri.