Marco Degli Uomini, skiatori 18-vjeçar, ka ndërruar jetë pas një aksidenti tragjik të shtunën në Zoncolan. Pas një fluturimi të gjatë prej rreth 70 metrash, ai ra keq në dëborë dhe u dërgua menjëherë me helikopter në spitalin e Tolmezzo.

Fillimisht, mjekët ishin optimistë pasi skiatori nuk humbi ndjenjat pas aksidentit, edhe pse kishte pësuar fraktura të shumta dhe një dëmtim të dyshuar në kokë. Megjithatë, komplikimet serioze u shfaqën menjëherë pas mbërritjes në spital, duke kërkuar transferim urgjent në spitalin e Udines.

Pasi u fut në terapi intensive, Marco ra në koma dhe, pavarësisht përpjekjeve të mjekëve, humbi jetën. Ky aksident ka tronditur shumë komunitetin e skiatorëve dhe familjarët e të riut, që tashmë kanë humbur një djalë të ri dhe të talentuar.