Pavarësisht kundërshtimit të hapur të Sllovakisë, kancelari gjerman Friedrich Merz shprehu besimin se “javën e ardhshme, liderët e BE-së do të miratojnë paketën e re të sanksioneve kundër Rusisë”, të propozuar nga Komisioni Evropian.

“Nëse gjithçka ecën sipas planit, atëherë javën e ardhshme do të jetë vendosur,” u shpreh Merz, duke shtuar se përgatitje të ngjashme për masa kundër Moskës po zhvillohen edhe në Uashington.

⸻

Negociatat e para në Bruksel, mundësi për debat edhe në Këshillin Evropian

I pyetur mbi refuzimin sllovak, Merz sqaroi se “komisioni i përfaqësuesve të përhershëm në Bruksel do të negociojë për herë të parë për paketën javën që vjen.” Në rast se nuk arrihet një dakordësi, çështja mund të shtrohet në tryezën e Këshillit Evropian.

“Nëse do të jetë e nevojshme, do të duhet të bisedojmë edhe njëherë në Këshillin Evropian. Por ndoshta që javën e ardhshme do të ketë një marrëveshje,” tha Merz.

⸻

Fico i prerë: “Pa zgjidhje për krizën tonë energjetike, nuk ka mbështetje”

Nga ana tjetër, Kryeministri i Sllovakisë, Robert Fico, u shpreh kundër paketës së 18 të sanksioneve ndaj Rusisë në formën aktuale, duke i bërë një thirrje të drejtpërdrejtë Brukselit.

“Sllovakia nuk do ta mbështesë paketën e 18 të sanksioneve kundër Rusisë, nëse Komisioni i BE-së nuk parashtron një zgjidhje të vërtetë për situatën e krizës, në të cilën ndodhet vendi ynë pas ndërprerjes së furnizimeve me gaz, naftë dhe lëndë djegëse bërthamore nga Rusia,” deklaroi Fico në një postim në Facebook.

⸻

BE në kërkim të unitetit, përballë krizave të shumëfishta

Pakoja e re e sanksioneve, e 18-ta me radhë që nga nisja e agresionit rus në Ukrainë, synon të godasë më tej burimet energjetike, sektorin financiar dhe kompanitë e përfshira në mbështetjen e luftës.

Megjithatë, kundërshtimi i një anëtari si Sllovakia – që përballet me një krizë të thellë energjetike – mund të pengojë arritjen e konsensusit të domosdoshëm në nivel BE-je. Sytë janë drejtuar nga Brukseli, ku negociatat pritet të intensifikohen ditët në vijim.