TIRANË – Pas paralajmërimit të kryeministrit Edi Rama, Partia Socialiste ka depozituar në Kuvend një rezolutë të qartë dhe të detajuar kundër Republikës Islamike të Iranit, me kërkesën që Shqipëria ta shpallë këtë vend si shtet sponsor të terrorizmit dhe të dënojë veprimet e saj destabilizuese dhe sulmet kibernetike ndaj vendit tonë.
Rezoluta, e cila synon të përcaktojë qëndrimin e Shqipërisë ndaj kërcënimeve nga Irani, përfshin disa pika kyçe:
1. Dënon veprimet e Iranit që mbështesin ose kryejnë akte terrorizmi dhe aktivitete destabilizuese në rajone të ndryshme të botës, duke shprehur solidaritet me vendet e Gjirit Persik dhe Turqinë, të cilat janë shënjestruar nga aktiviteti terrorist i sponsorizuar nga Irani.
2. Përmend sulmet kibernetike ndaj institucioneve shqiptare, duke përfshirë sulmin e vitit 2022 ndaj infrastrukturës shtetërore dhe përpjekjet e fundit për ndërhyrje në sistemet e Kuvendit.
3. Shpall Republikën Islamike të Iranit si Shtet Sponsor të Terrorizmit dhe si shtet që përdor mjete terroriste për të ndjekur objektiva të politikës së jashtme.
4. Dënon Gardën Revolucionare Islamike (IRGC) dhe entitetet e lidhura për mbështetjen e organizatave terroriste dhe operacioneve destabilizuese.
5. Bën thirrje që qeveria shqiptare të forcojë masat kombëtare dhe ndërkombëtare kundër terrorizmit dhe kërcënimeve kibernetike, të bashkëpunojë me vendet aleate dhe të shpallë IRGC dhe Hezbollah si organizata terroriste.
6. Fton vendet demokratike dhe organizatat ndërkombëtare të shqyrtojnë masa të koordinuara kundër terrorizmit të sponsorizuar nga shtetet.
7. Rikonfirmon përkushtimin e Shqipërisë ndaj paqes ndërkombëtare, vlerave demokratike dhe mbrojtjes së civilëve nga aktet terroriste.
8. Udhëzon që rezoluta të përcillet te qeveria shqiptare, aleatët dhe organizatat ndërkombëtare, përfshirë OKB-në dhe Bashkimin Evropian.
Ky hap tregon qartësisht orientimin e politikës së jashtme shqiptare në përballje me kërcënimet e sponsorizuara nga shtetet, duke u bashkuar me vendet e tjera aleate në një qëndrim të koordinuar ndërkombëtar.
