Bashkëshortja e këngëtarit të ndjerë Shpat Kasapi, Selvije Kasapi, është kthyer në Itali së bashku me djalin e tyre të vogël, Roel, por këtë herë rrugëtimi ka qenë i mbushur me dhimbje dhe mungesë të madhe. Udhëtimi, që dikur bëhej në tre, tani është kryer pa praninë e Shpatit.

Përmes një postimi prekës në Instagram, Selvija ka ndarë me ndjekësit një foto të dy biletave të avionit, të sajës dhe të Roelit, duke shprehur mallin dhe boshllëkun që ka lënë humbja e bashkëshortit të saj.
“Sot do doja më shumë se gjithçka të kisha edhe biletën tënde në dorë”, shkruan ajo, një fjali që pasqyron dhimbjen e thellë të ndarjes së parakohshme.

Familja ishte zhvendosur në Itali për shkak të nevojave shëndetësore të djalit të tyre, Roelit, i cili kërkon vizita dhe kujdes të vazhdueshëm mjekësor. Planet për të qëndruar dhe përballuar së bashku këtë sfidë u ndërprenë tragjikisht mbrëmjen e 26 nëntorit, kur Shpat Kasapi ndërroi jetë papritur.

Këngëtari u nda nga jeta pas një problemi kardiak, duke lënë pas dhimbje të madhe tek familja, miqtë dhe fansat e tij, të cilët reaguan masivisht me mesazhe ngushëllimi dhe homazhe në kujtim të artistit. Rikthimi i Selvijes dhe Roelit në Itali, këtë herë pa Shpatin, është një tjetër dëshmi e dhimbshme e boshllëkut që ka lënë humbja e tij.