Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet ndaj ish-kryebashkiakut të Kavajës, Elvis Rroshi, dhe ka dorëzuar dosjen në gjykatë.

Pak ditë pas paraqitjes së Rroshit në SPAK, ku iu komunikua mbyllja e hetimeve, prokurori Elvin Gokaj i është drejtuar Gjykatës së Posaçme kundër Korrupsionit dhe Krimit të Organizuar (GJKKO) me kërkesën për kalimin e çështjes në gjykim.

Gjyqtarja Rudina Palloj është caktuar për shqyrtimin e kërkesës së prokurorisë lidhur me ish-kryetarin e Bashkisë së Kavajës, i cili akuzohet për veprën penale të “shpërdorimit të detyrës”.

Hetimi është nisur pas një kallëzimi të bërë nga Kontrolli i Lartë i Shtetit (KLSH), i cili ka evidentuar parregullsi në procedurat e tenderimit gjatë periudhës kur Rroshi drejtonte Bashkinë e Kavajës.