Gjykata e Posaçme e Apelit për Korrupsionin dhe Krimin e Organizuar ka vendosur masën e sigurisë “arrest me burg” për Bajron Gumenin, menaxher i kompanisë “Alba Exotic Fruit”, në kontejnerët e së cilës në Portin e Durrësit u kap tre herë kokainë brenda pak ditësh.
Ndonëse fillimisht hetimet u kryen nga Prokuroria e Durrësit, dosja i kaloi SPAK pasi ka dyshime se trafiku i drogës është kryer në kuadër të grupit të strukturuar kriminal.
Gumeni u arrestua më 13 korrik në Durrës pas kapjes së 11 kg kokainë në kontejnerët e “Alba Exotic Fruit”. Në kontejnerët e “Alba Exotic Fruit” janë sekuestruar në total tre ngarkesa me kokaine.
Më 13 korrik, kur nisi edhe operacioni “Rada”, Policia Kufitare sekuestroi sasinë prej 11 kg e 675 gramë kokainë, ndërkohë që më 23 korrik u sekuestrua edhe një sasi tjetër prej 6.5 kg. Ndërsa dy dite me pare u kapen edhe 7 kg te tjera.
Në kërkim është shpallur edhe administratori i kompanisë Eduart Dauti.
Akuzat u kundërshtuan nga Gumeni përmes avokatit Elton Hyseni i cili kërkoi që dosja t’i kthehet prokurorisë së Durrësit.
