Një hetim i mundshëm nga SPAK ka ngritur dyshime të reja për përfitimet e paligjshme të Ridvan Bodes, ish-ministër i Financave në qeverinë e Sali Berishës, i cili mund të ketë përfituar dhjetëra mijëra euro përmes djalit të tij, Eraldo Bode, nga kompani që kanë pasur lidhje me sektorin publik gjatë kohës që Bode mbante detyrën. Hetimi mund të zbulojë përfitime të tjera të paligjshme për shkak të vendimmarrjeve të tij si ministër.
Sipas të dhënave, Telekom Albania (sot One Albania), e cila ishte aksionere me 2.5% në Ministrinë e Financave, ka paguar dhjetëra mijëra euro përmes një kontrate qiraje të dyshimtë me Eraldo Bode, me vlerë që tejkalon tregun e qirave. Po ashtu, fëmijët e Bodes, Adela dhe Eraldo Bode, kanë marrë pagesa të konsiderueshme nga kompani që kanë përfituar koncensione publike gjatë periudhës kur Bode drejtonte ministrinë.
Në lidhje me aktivitetet financiare të Bodes dhe familjes së tij, është raportuar se dhëndri i Bodes, Ali Vishaj, dhe i biri, Eraldo Bode, krijuan një kompani financiare, AvA Consulting, për dhënien e kredive me interesa të larta, duke shkelur ligjin gjatë kohës që Bode ishte ende ministër.
Në vitin 2015, Inspektorati i Lartë i Deklarimit dhe Kontrollit të Pasurive e kallëzoi Bode për fshehje pasurie dhe pastrim parash, pasi ai nuk justifikoi një pasuri prej 500 mijë eurosh. Megjithatë, prokurori Arqile Koça, i cili ishte pjesë e hetimeve, nuk e konsideroi këtë vepër penale, duke i mbyllur dosjen pas një shqyrtimi të mëtejshëm.
Pas kësaj, në vitin 2018, Ridvan Bode u emërua anëtar i Këshillit Mbikqyrës të Bankës së Shqipërisë, duke sjellë një konflikt interesi, pasi edhe e bija, Adela Bode, ishte e punësuar në të njëjtin institucion. Në këtë periudhë, dhëndri i tij, Ali Vishaj, ishte gjithashtu aksioner në një bankë, ndërsa Eraldo Bode lëshonte kredite përmes një kompanie financiare.
Ky hetim mund të zbulojë më shumë detaje mbi lidhjet e Bodes me sektorin financiar dhe mundësitë e mundshme për përfitime të paligjshme gjatë periudhës që ai mbante pozita të larta në qeverinë shqiptare.
