TIRANË – Prokuroria e Posaçme kundër Korrupsionit dhe Krimit të Organizuar (SPAK) ka zbuluar një tjetër episod të dyshuar korrupsioni që lidhet me çiftin Ilir Meta–Monika Kryemadhi, duke zgjeruar më tej hetimet për mënyrën se si janë përdorur fondet dhe shërbimet e ofruara nga persona të tretë.

Burime konfidenciale bëjnë me dije se SPAK ka zbardhur lëvizjet financiare të një karte tjetër bankare, që i është vënë në dispozicion çiftit nga biznesmeni Adrian Shatku – i njëjti emër që u përmend më herët në lidhje me përdorimin e një karte “American Express” për shpenzime personale nga Kryemadhi.

Kjo kartë e dytë dyshohet se është përdorur për blerje dhe shpenzime të ndryshme nga ish-presidenti dhe ish-kryetarja e LSI-së, për periudha të caktuara kohore, ndërsa SPAK po heton nëse kemi të bëjmë me përfitime të paligjshme dhe ndikim të mundshëm të papërshtatshëm nga Shatku.

Në një tjetër pistë hetimore që lidhet me lobimin ndërkombëtar të LSI-së, SPAK pritet të konkretizojë akuzat ndaj Ilir Metës, pas të dhënave të reja që kanë mbërritur përmes letërporosive nga jashtë vendit. Hetimet përqendrohen në pagesat e kryera dhe kontratat e lobimit, të cilat mund të kenë përfshirë fonde të padeklaruara.

Ndërkohë, këtë të premte Meta do të përfaqësohet nga avokati Kujtim Cakrani në seancën gjyqësore në GJKKO, ku do të shqyrtohet kërkesa për ndryshim të masës së sigurisë ndaj tij.

Sekretari i Përgjithshëm i Partisë së Lirisë, Tedi Blushi, ka njoftuar se Meta nuk do të jetë i pranishëm në këtë seancë, por do të marrë pjesë personalisht “në çdo seancë gjykimi në themel për t’u ballafaquar me prokurorët e SPAK dhe dëshmitarët e Edi Ramës”, duke e cilësuar çështjen si të motivuar politikisht.

SPAK nuk ka komentuar zyrtarisht mbi zbulimet e fundit, por burime brenda institucionit lënë të kuptohet se pritet një intensifikim i veprimeve hetimore në ditët në vijim.