Dizajnerja e njohur Diane von Fürstenberg ka folur hapur për orientimin seksual të bashkëshortit të saj, Barry Diller, i cili në kujtimet e tij të reja “Who Knew” pranoi se është homoseksual. Megjithatë, Diane thekson se kjo nuk ka ndryshuar marrëdhënien e tyre të ngushtë dhe të qëndrueshme.

“Cila është diferenca? Nuk ndryshon asgjë,” tha Diane në një intervistë për Variety, duke shtuar se për të mbështetja ndaj Barryt nuk është diçka e jashtëzakonshme. Ajo ka qenë personi i vetëm me të cilin Diller ishte i hapur për 50 vjet, shumë para publikimit të librit të tij.

Diane, 78 vjeç, është martuar me Diller prej 24 vitesh dhe ka kujtuar edhe martesën e saj të parë me princin Egon von Fürstenberg, i cili gjithashtu kishte folur për biseksualitetin e tij pas ndarjes. “Jam martuar me dy burra gay, në rregull? Për mua, kjo nuk ndryshon asgjë për mënyrën si i shoh unë,” tha ajo me sinqeritet.

Ajo përshkroi fillimet e lidhjes së tyre si miqësi që u shndërrua në pasion, duke e cilësuar këmbëngulësinë e Barryt si të pabesueshme. Ndërkohë, Diller ka thënë në kujtimet e tij se edhe për të, lidhja ka qenë një surprizë e madhe: “Nuk mund ta shpjegoj as për veten time, as për botën.”