Kancelari i Austrisë, Christian Stocker, theksoi se sipas perspektivës së Bashkimit Evropian, dialogu mes Kosovës dhe Serbisë mbetet i pazëvendësueshëm, për sa kohë ekziston vullneti për të gjetur zgjidhje të qëndrueshme.

“Vërtet besoj se ekziston gatishmëri për të gjetur një zgjidhje, pavarësisht të gjitha vështirësive, por duhet të them hapur se unë nuk mund ta ofroj atë,” deklaroi Stocker gjatë vizitës së tij në Serbi më 13 gusht, duke shtuar se zgjidhja duhet të sigurojë bashkëjetesë paqësore për të gjithë njerëzit në rajon.

Ai nënvizoi se dialogu duhet të zhvillohet brenda procesit të Serbisë drejt Bashkimit Evropian dhe mirëpriti çdo nismë që do t’i rikthejë të dy vendet në tryezën e bisedimeve. Sidoqoftë, rundi i fundit i dialogut Kosovë-Serbi, i ndërmjetësuar nga BE-ja, u zhvillua më 10 qershor, ndërsa nuk ka pasur takim të nivelit të lartë që nga sulmi i serbëve të armatosur kundër Policisë së Kosovës në Banjskë në shtator 2023.

Presidenti serb Aleksandar Vuçiç vlerësoi Austrinë si një partner të rëndësishëm për Serbinë dhe theksoi se Vjena gjithmonë ka mbështetur rrugën evropiane të Beogradit. “Biseduam për të gjitha çështjet e rëndësishme, nga reformat në Serbi në fushën e sundimit të ligjit deri te dialogu me Prishtinën si mënyra e vetme për të tejkaluar tensionet dhe krizën ekzistuese,” tha Vuçiç.

Stocker shtoi gjithashtu se të gjitha vendet e Ballkanit Perëndimor i përkasin pandashëm familjes evropiane dhe se rajoni duhet të mbrohet nga përpjekjet destabilizuese. Ai theksoi se rruga drejt BE-së nuk është një rrugë njëkahëshe dhe se sundimi i ligjit, liritë themelore dhe bashkëjetesa demokratike janë parametra kyç për përparimin në procesin e anëtarësimit.

Sa i përket harmonizimit të politikës së jashtme me BE-në, Vuçiç vuri në dukje se Serbia ka shprehur pozicionin e saj për sanksionet ndaj Rusisë, duke mbajtur raporte të mira me Moskën dhe duke mbështetur disa rezoluta ndërkombëtare, pa vendosur sanksione të drejtpërdrejta.

Ky takim i ngarkuar me mesazhe politike thekson rëndësinë që Bashkimi Evropian i jep stabilitetit dhe bashkëpunimit rajonal, ndërsa Serbia vazhdon të përgatitet për rrugëtimin e saj drejt anëtarësimit.