Anëtarët e NATO-s nuk duhet të pengohen në ofrimin e ndihmës për Ukrainën për shkak të “retorikës së pamatur bërthamore” nga ana e presidentit rus Vladimir Putin, deklaroi shefi në largim i NATO-s, Jens Stoltenberg, në një intervistë për Reuters.

Stoltenberg i bëri këto komente pas një deklarate të Putinit, i cili paralajmëroi se Rusia mund të përdorë armë bërthamore nëse sulmohet me raketa konvencionale, duke e konsideruar çdo sulm të mbështetur nga një fuqi bërthamore si një sulm të përbashkët.

Ky paralajmërim erdhi në një moment kur Shtetet e Bashkuara dhe aleatët e saj po diskutojnë mundësinë që t’i lejojnë Ukrainës të lëshojë raketat konvencionale perëndimore thellë në territorin rus, për të goditur objektivat që mbështesin përpjekjet luftarake të Moskës.

Stoltenberg theksoi se “çdo herë që kemi rritur mbështetjen tonë me lloje të reja armësh – si tanket luftarake, raketat me rreze të gjatë ose F-16 – rusët janë përpjekur të na pengojnë.” Ai shprehu besimin se duhet të vazhdojmë të ofrojmë mbështetje të fortë për Ukrainën, pavarësisht këtyre kërcënimeve.

Pas një dekade në krye të NATO-s, Stoltenberg do t’i dorëzojë udhëheqjen ish-kryeministrit holandez Mark Rutte të martën.