Një 21-vjeçar ka rënë në prangat e policisë në Tiranë, pasi akuzohet se ka mashtruar disa qytetarë duke përdorur identitet të rremë, me qëllim zhvatjen e parave. Ai u arrestua në flagrancë, në momentin që po tentonte të merrte një shumë të konsiderueshme parash nga një 26-vjeçare, të cilën e kishte mashtruar edhe më parë.

Operacioni u zhvillua nga forcat e policisë në kuadër të operacionit të koduar “Strategjia”, ku u kap dhe u ndalua shtetasi E. H., 21 vjeç, banues në Paskuqan.

“Si rezultat i veprimeve operative të ndjekura me intensitet, u arrestua në flagrancë shtetasi E. H., teksa po i merrte një tjetër shumë parash denoncueses,” – njoftoi Policia e Shtetit përmes një deklarate zyrtare.

Ndërkohë, vijojnë hetimet për të dokumentuar raste të tjera të mundshme mashtrimi, që dyshohet se janë kryer nga i riu.

Materialet procedurale i janë referuar Prokurorisë së Tiranës, që do të vijojë me veprimet ligjore përkatëse.