Një studim i ri i realizuar nga Amsterdam UMC dhe i publikuar në Nature ka zbuluar se shtatzënia ndikon jo vetëm në trupin e gruas, por edhe në strukturën dhe funksionimin e trurit.

Sipas kërkimit, gjatë nëntë muajve të shtatzënisë ndodhin transformime të rëndësishme në zonat e trurit që lidhen me vëmendjen, reagimin ndaj stimujve dhe marrëdhëniet sociale. Studimi përfshiu 110 gra, duke analizuar si shtatzënitë e para ashtu edhe ato të dytat, dhe arriti në përfundimin se çdo shtatzëni lë një ndikim të qëndrueshëm në tru.

Ndryshimet më të theksuara janë vërejtur në zonat që ndihmojnë nënën të kuptojë nevojat e foshnjës, të interpretojë të qarën dhe të reagojë ndaj rreziqeve. Këto transformime konsiderohen thelbësore për krijimin e lidhjes nënë-fëmijë dhe për kujdesin ndaj të porsalindurit.

Studimi thekson gjithashtu lidhjen mes këtyre ndryshimeve dhe shëndetit mendor. Tek nënat që lindin për herë të parë, rreziku për depresioni pas lindjes paraqitet më i lartë, ndërsa tek gratë që presin fëmijën e dytë, ky rrezik mund të shfaqet që gjatë shtatzënisë.

Ekspertët vlerësojnë se këto gjetje mund të shërbejnë si bazë për politika më efektive në parandalimin dhe trajtimin e problemeve të shëndetit mendor tek nënat, duke theksuar rëndësinë e monitorimit të hershëm dhe mbështetjes psikologjike.