Kushdo që ndan jetën e tij të përditshme me një qen, e di mjaft mirë se shoku i tyre me katër këmbë i kupton në mënyrë të përsosur sinjalet dhe gjuhën tonë. Megjithatë, hulumtimi më i ri i studiuesve ka zbuluar se qentë janë në gjendje të bëjnë dallimin midis gjuhëve të ndryshme dhe të kuptojnë nëse ajo në të cilën po flasim është me të vërtetë një gjuhë tjetër apo është thjesht një grumbull tingujsh pa asnjë kuptim.

Një ekip studiuesish nga Universiteti Eötvös Loránd në Budapest, Hungari, zbuluan këtë aftësi për miqtë tanë me katër këmbë. Ata analizuan aktivitetin e trurit të tetëmbëdhjetë qenve, dy prej të cilëve vinin nga familje që flisnin spanjisht, ndërsa gjashtëmbëdhjetë të tjerët i përkisnin familjeve të gjuhës hungareze.

Aktiviteti i tyre i trurit u vlerësua kur qentë dëgjuan një fragment nga një pjesëtar i familjes në spanjisht dhe hungarisht, e më pas dëgjuan të njëjtat regjistrime në versione të ndryshuara që nuk kishin kuptim dhe lidhje me njëra-tjetrën.

Në analizimin e përgjigjes ndaj këtyre regjistrimeve, studiuesit vunë re se miqtë tanë me katër këmbë janë me të vërtetë në gjendje të bëjnë dallimin midis fjalëve normale dhe fjalëve të pakuptimta, pavarësisht nga gjuha e folur.