Një studim i fundit i kryer nga Universiteti i Manchesterit ka konfirmuar se njerëzit që vuajnë nga probleme shëndetësore afatgjatë, si artriti, ndiejnë dhimbje më të forta gjatë ditëve me shi dhe lagështi. Kjo ka qenë një teori e përhapur ndër vite nga ata që vuajnë nga këto sëmundje, dhe tani është mbështetur me prova shkencore.

Në Shqipëri, njerëzit që vuajnë nga reumatizma dhe artriti shpesh e kanë të qartë se kur do të ndodhin ndryshime në mot. Ata ndiejnë dhimbje si një sinjal paralajmërues dhe kur moti ndryshon, dhimbja bëhet më e madhe. Kjo është një shqetësim i përbashkët për shumë individë të prekur nga këto sëmundje.

Çfarë është Artriti?

Artriti është një term që përfshin më shumë se 100 sëmundje dhe çrregullime autoimunitare, të cilat shkaktojnë dhimbje, ngurtësim dhe enjtje të kyçeve dhe nyjeve. Sëmundjet autoimunitare ndodhin kur sistemi imunitar sulmon trupin, duke e detyruar atë të dëmtojë indet e shëndetshme që rrethojnë kyçet. Disa nga format më të zakonshme të artritit përfshijnë osteoartritin, reumatizmin dhe fibromialgjinë. Këto sëmundje kanë simptoma të ngjashme, si dhimbje dhe ngurtësim, dhe shpesh mund të ndërthuren me njëra-tjetrën. Përveç simptomave të dukshme që prekin kyçet, ato mund të shkaktojnë edhe simptoma të tjera.

Moti dhe Dhimbja

Studiuesit në Universitetin e Manchesterit analizuan të dhënat e 2,500 personave të prekur nga artriti, fibromialgjia dhe migrena, dhe arritën në përfundimin se dhimbjet përkeqësoheshin gjatë ditëve me lagështi. Shumica e pjesëmarrësve në studim ishin të bindur se dhimbja që ndjenin i ndihmonte ata të parashikonin ndryshimet e motit. Pavarësisht se studimet mbi këtë lidhje kanë qenë të kufizuara, të dhënat tregojnë se dhimbja ishte 20% më e lartë në ditët me lagështi dhe erë. Po ashtu, kur moti ishte i ftohtë dhe me lagështi, dhimbjet përkeqësoheshin më shumë.

Ekspertët theksuan se nëse shkencëtarët arrijnë të zbulojnë lidhjen e saktë mes lagështisë dhe dhimbjes, kjo mund të çojë në zhvillimin e trajtimeve më efikase për menaxhimin e sëmundjeve të tilla si artriti dhe reumatizma.