Stuhia “Bert” ka goditur Britaninë që nga dita e djeshme, duke shkaktuar reshje të dendura shiu, borë dhe erëra të forta, ndërsa sot disa zona përballen me përmbytje të mëdha. Disa rajone të Uellsit të Jugut janë vënë nën alarm “të kuq”, pasi një lumë ka dalë nga shtrati dhe ka sjellë përmbytje masive.

Një zyrtar lokal, i cili po punon me ekipin e tij për të ndihmuar të prekurit, tha se “me pikëllim të thellë shikoj shkatërrimin e shkaktuar nga stuhia e mbrëmshme dhe përmbytjet e rënda në komunitetet tona. Përmbytjet në zonat Rhondda dhe Ogmore janë të paprecedentë. Nuk e kam parë kurrë më parë në këtë shkallë.” Ai shtoi se ekipi i tij po punon pa pushim për të mbështetur të prekurit nga stuhia.

Mbi 100 paralajmërime dhe alarme për përmbytje janë lëshuar në të gjithë Uellsin, duke përfshirë ura të mbyllura dhe rrugë të bllokuara. Ujërat në rritje janë raportuar në disa qytete, përfshirë Pontypridd, Ebbw Vale dhe Aberdare, ndërsa edhe rrëshqitje dheu janë regjistruar në veri të vendit.

Fotot dhe videot që po shpërndahen në rrjetet sociale tregojnë pjesë të Pontypridd nën ujë, me makina të zhytura dhe pronarët e shtëpive që po evakuojnë pronat e tyre pranë lumit Taff. Banorët janë paralajmëruar të qëndrojnë larg lumenjve të fryrë dhe të mos udhëtojnë me makina nëpër ujërat e përmbytura, për të shmangur rreziqet.