Njohje historike për Kosovën:

Në një njoftim të bërë publik në platformën X, Presidentja e Kosovës, Vjosa Osmani, ka shpallur lajmin e njohjes së Kosovës nga Sudani, duke theksuar se kjo shënon një hap të rëndësishëm në forcimin e diplomacisë dhe ndërkombëtarizimin e shtetit kosovar.

“Ky është fillimi i një partneriteti madhështor”, shkroi Osmani, duke theksuar rëndësinë strategjike të kësaj njohjeje.

Vendimi u bë publik gjatë Forumit të Diplomacisë në Antalia të Turqisë, ku Osmani u shfaq përkrah ministrit të Jashtëm të Sudanit, Ali Yousuf al-Sharif, i cili e informoi për vendimin zyrtar të presidentit të Sudanit për të njohur pavarësinë e Kosovës dhe për të vendosur marrëdhënie diplomatike me të.

Kjo është njohja e dytë brenda pak ditësh për Kosovën, pas asaj nga Kenia në fund të marsit – një valë e re mbështetjeje ndërkombëtare pas një periudhe stagnimi në procesin e njohjeve. Para Kenias dhe Sudanit, shteti i fundit që kishte njohur Kosovën ishte Izraeli në vitin 2021.

Njohja nga Sudani e çon numrin e përgjithshëm të shteteve që e njohin Kosovën në 119 dhe vjen në një moment kritik, ku Kosova po përpiqet të konsolidojë subjektivitetin e saj ndërkombëtar në përballje me fushatën e vazhdueshme kundërshtuese të Serbisë.

Reagimi i Beogradit pritet të jetë i ashpër, ashtu siç ndodhi pas njohjes nga Kenia, të cilën Serbia e quajti “hap i rrezikshëm” dhe paralajmëroi se mund të ndikojë në marrëdhëniet e saj me shtetet afrikane.

Megjithatë, për Prishtinën, këto dy njohje përbëjnë fitore të rëndësishme diplomatike, që jo vetëm i japin shtysë forcimit të sovranitetit të saj në arenën ndërkombëtare, por edhe sinjalizojnë një kthesë të re në mbështetjen për shtetin më të ri në Evropë.