Një shtetas suedez është vënë nën akuzë pasi dyshohet se ka detyruar bashkëshorten e tij të kryejë marrëdhënie seksuale me më shumë se 120 burra gjatë disa viteve të fundit.

Sipas agjencisë norvegjeze të lajmeve NTB, veprimet e dyshuara janë kryer si në takime fizike, ashtu edhe përmes kontakteve online. Rasti u bë publik së fundmi, ndërsa i dyshuari ndodhet në paraburgim që nga tetori, nën akuzën për prostitucion të rënduar dhe vepra të tjera të lidhura.

Denoncimi është bërë nga vetë gruaja, e cila iu drejtua policisë. Në një intervistë për një radio suedeze, ajo deklaroi se në disa raste ishte nën ndikimin e alkoolit dhe drogës në një masë të tillë sa nuk arrinte të kujtonte plotësisht çfarë kishte ndodhur.

Sipas mediave suedeze, aktakuza formale pritet të ngrihet në muajin mars. Ndërkohë, hetimet kanë përfshirë edhe personat që dyshohet se kanë qenë klientë, të cilët vinin nga zona të ndryshme të Suedisë dhe mund të përballen gjithashtu me pasoja penale.

Autoritetet nuk kanë bërë publike identitetet e të përfshirëve, ndërsa hetimi vijon për të zbardhur plotësisht rrethanat e çështjes.