Ina Kosturi, profesore e asociuar e violinës në Universitetin e Arteve, është vlerësuar me medalje bronzi në Global Music Awards (GMA) në Shtetet e Bashkuara të Amerikës, për kompozimin e saj original “Koncert për violinë dhe orkestër”.

Global Music Awards njihen si një nga platformat më prestigjioze ndërkombëtare që vlerëson artistë dhe kompozitorë me nivel të lartë profesional. Juria përbëhet nga personalitete të muzikës, përfshirë fitues të çmimeve “Grammy” dhe “Emmy”, ndërsa konkurrimi përfshin pjesëmarrës nga e gjithë bota dhe një gamë të gjerë zhanresh muzikore – nga muzika instrumentale dhe simfonike, te muzika e filmit dhe spektaklit.

Ky çmim për Ina Kosturin përfaqëson një tjetër moment kulmor në karrierën e saj artistike dhe akademike, duke e renditur atë mes emrave të spikatur të skenës ndërkombëtare të muzikës klasike. Vlerësimi në SHBA vjen pas një sërë çmimesh dhe njohjesh të fituara më herët në Slloveni, Maltë, Vjenë, Zvicër, Angli dhe vetë Shtetet e Bashkuara, duke konfirmuar vazhdimësinë e suksesit të saj.

Arritja e profesoreshës së Fakultetit të Muzikës është një vlerë e shtuar jo vetëm për Universitetin e Arteve, por edhe për promovimin e krijimtarisë muzikore shqiptare në arenën ndërkombëtare.