Një plagosje e pesëfishtë ka ndodhur pasditen e sotme rreth orës 14:30 te Rrua e Kavajës, në Tiranë.

Rreth orës 14:30 një 34-vjeçar i identifikuar si Rudolf Nikolli, është futur në ambientet e xhamisë duke plagosur me thikë 5 persona. Mbeten ende të paqarta rrethanat se si është futur agresori në objektin e kultit.

Policia e Tiranës ka dhënë një informacion zyrtar në lidhje me gjendje shëndetësore të personave që u plagosën sot me thikë në një xhami dhe jashtë saj në kryeqytet.

Ngjarja e rëndë ndodhi tek Rruga e Kavajës ‘Dine Hoxha’. 5 personat e plagosur janë; Donald Koçi, rreth 35 vjeç, Mariglen Konja, rreth 22 vjeç, Kleon Jaupaj, rreth 24 vjeç, Anri Tola, rreth 26 vjeç dhe Saba Peposhi, rreth 23 vjeç.

Të pesë të plagosurit janë transportuar në spital, kanë marrë ndihmën mjekësore. Kanë dëmtime në gjymtyrë për shkak të përleshjes dhe jo dëmtime në organet kryesore.

Informacion paraprak

Rreth orës 14:30, në Rrugën e Kavajës, një shtetas është futur në ambientet e një kulti fetar (xhami) dhe në rrethana ende të paqarta ka plagosur me mjet prerës 5 shtetas.

Falë reagimit profesional dhe të menjëhershëm të shërbimeve të Policisë është bërë i mundur neutralizimi dhe prangosja e autorit të dyshuar, shtetasi Rudolf Nikolli 34 vjeç, nga Burreli, i cili po shoqërohet në ambientet e Drejtorisë Vendore të Policisë Tiranë, për veprime të mëtejshme.

Ndërkohë, shërbimet e Policisë iu kanë dhënë ndihmën e parë shtetasve të lënduar, të cilët janë transportuar në spital, për ndihmë mjekësore dhe ndodhen jashtë rrezikut për jetën

Në vendngjarje ka mbërritur grupi hetimor dhe nën drejtimin e Prokurorisë vijon puna për sqarimin e rrethanave dhe dokumentimin e plotë ligjor të ngjarjes.