Një sulm i rëndë ka tronditur Magdeburgun, Gjermani, mbrëmjen e sotme, kur një makinë është futur me shpejtësi në një turmë në tregun e Krishtlindjeve. Deri tani raportohet për dy të vdekur, një person të rritur dhe një fëmijë, si dhe 68 të plagosur. Incidenti ka shkaktuar shqetësime të mëdha për sigurinë në tregjet e Krishtlindjeve në Gjermani.

Kancelari gjerman Olaf Scholz ka reaguar përmes një postimi në X, ku tha se lajmet nga Magdeburg sugjerojnë “më të keqen”. Ai shprehu ngushëllimet për viktimat dhe familjet e tyre dhe falënderoi punonjësit e shpëtimit për përpjekjet e tyre në orët e ankthit.

Autori i sulmit është identifikuar si një 50-vjeçar mjek me origjinë saudite, i cili është arrestuar nga autoritetet. Ai dyshohet të ketë përdorur një makinë të markës BMW për të kryer sulmin. Mësohet se autori kishte marrë me qira automjetin për ta përdorur në këtë akt të dhunshëm.

Policia ka rrethuar zonën dhe po kryen kontrolle për të siguruar që nuk ka eksplozivë të mundshëm. Në përgjigje të ngjarjes, qyteti i Halle, rreth 80 kilometra larg, ka rritur masat e sigurisë në tregjet e tij të Krishtlindjeve dhe spitalet po përgatiten për të pritur të plagosurit.

Ky sulm ka ngritur shqetësime për sigurinë në këtë periudhë të festave dhe autoritetet vazhdojnë hetimet për të zbardhur rrethanat e ngjarjes.