Radoslaw Holowczyc, guide turistike polak me përvojë, ka denoncuar sulmin e rëndë fizik që pësoi më 2 gusht 2025 në zonën e ujërave termale pranë Përmetit. Ai tregon se u sulmua nga stafi i një agjencie udhëtimi polake konkurente, Kaki Tours, duke përfshirë bashkëpritësin Albi Miftari dhe dy punonjës të tij shqiptarë.

“Albi erdhi nga përpara, punonjësit e tij, një nga e djathta, një nga e majta. Të tre filluan të më godisnin në kokë dhe fytyrë me grushte. Njëri prej tyre më përdredhi krahun që të mos mund të mbrohesha. Më rrëzuan përtokë dhe filluan të më shkelmonin në kokë, gjoks, stomak, brinjë. Më grisën edhe vathët që kisha në veshë. Më grabitën gjithashtu telefonin, me vlerë disa qindra euro, dhe e thyen,” tha Holowczyc.

Ai përshkruan edhe një katërt të pranishëm, punonjësin Mateusz, i cili nuk mori pjesë në sulm, por “nuk u përpoq të qetësonte situatën apo të thërriste ndihmë.”

Sulmin e ndërprenë dy turistë francezë që erdhën duke bërtitur, duke detyruar sulmuesit të largohen, ndërsa Holowczyc mbeti i shtrirë dhe i gjakosur.

Pas tre ditësh në spitale dhe analiza në Përmet, Gjirokastër dhe më pas në Tiranë, ku u ekzaminua edhe nga një mjek ligjor i Gjykatës së Lartë, ai tregon dëmtimet serioze: “Dëmtimet përfshijnë dhimbje të shumta koke, dëmtim të rëndë të parakrahut të djathtë, plagë në fytyrë dhe vesh, si dhe dëmtime të gjurit dhe kyçit, duke më penguar në jetën e përditshme dhe profesionin.”

Holowczyc akuzon sulmin si të paramenduar dhe të motivuar nga urrejtja dhe xhelozia profesionale: “Sulmuesit dinin saktësisht kur dhe ku do të isha. Datat e udhëtimeve të mia janë publike dhe ata ndoqën çdo lëvizje time.”

Në përfundim, ai thotë se po merr mbështetje psikologjike dhe falënderon publikun për solidaritetin e treguar. “Fatkeqësisht, ujërat termale do të më kujtojnë për një kohë të gjatë këtë ngjarje të dhimbshme.”