Kandidatja demokrate Jorida Tabaku, e cila siguroi mandatin e deputetes në Tiranë në përfundim të një gare të ngushtë me kolegun e saj Ilir Alimehmeti, ka folur sot për herë të parë pas fitores në një intervistë televizive, duke ndarë emocionet dhe reflektimet mbi procesin zgjedhor.

Tabaku u shpreh se nuk e konsideron këtë mandat si sukses personal, por si një përgjegjësi të madhe për të vijuar punën në shërbim të qytetarëve dhe Partisë Demokratike, në një periudhë sfiduese për forcën politike që ajo përfaqëson.

“Ka qenë një fushatë shumë e gjatë, e lodhshme, stresuese dhe me shumë vështirësi. PD vinte pas një sfide të brendshme. Kisha tre muaj larg familjes – fëmijët po e ndjenin mungesën, më kërkonin llogari… dhe ndihesha keq,” rrëfeu Tabaku.

Ajo vlerësoi mbështetjen e votuesve të djathtë, duke nënvizuar se mandati është një përgjegjësi për PD-në dhe jo triumf personal. E pyetur për rivalitetin me mjekun Ilir Alimehmeti, Tabaku pranoi se nuk është ndier mirë me faktin që gara ishte mes kolegësh.

“Gara me doktor Alimehemtin ishte e ngushtë. Personalisht, nuk ndihesha komode. Ai do t’i shërbente mirë Parlamentit dhe PD-së. Nuk kishte pse të ishte një përplasje mes nesh,” tha ajo.

Në lidhje me marrëdhënien gjatë fushatës, Tabaku la të kuptohet se kontaktet mes dy kandidatëve kanë qenë të kufizuara, por e përmbylli mesazhin me thirrjen për bashkim dhe përqendrim te qëllimi i përbashkët: shërbimi ndaj qytetarëve dhe ringritja e opozitës.