Në ambientet e Komisionit Qendror të Zgjedhjeve (KQZ) u zhvillua sot një takim i rëndësishëm ndërinstitucional me pjesëmarrjen e Komisionerit Shtetëror të Zgjedhjeve, Ilirjan Celibashi; Drejtuesit të SPAK, Altin Dumani; Prokurorit të Përgjithshëm, Olsian Çela dhe Drejtorit të Policisë së Shtetit, Ilir Proda.

Sipas njoftimit zyrtar të KQZ-së, qëllimi i takimit ishte forcimi i bashkëpunimit për garantimin e integritetit të zgjedhjeve dhe përmirësimi i reagimit institucional ndaj çdo tentative për shkelje të ligjit zgjedhor.

Në qendër të diskutimeve ishin masat parandaluese dhe ndëshkuese për çdo formë presioni, ndikimi apo shkeljeje që cenon vullnetin e zgjedhësve. Palët ndanë informacione konkrete mbi kallëzimet e deritanishme, duke theksuar nevojën për reagim të menjëhershëm dhe të koordinuar të prokurorisë dhe policisë për çdo incident që minon besimin publik.

Temë e veçantë e takimit ishte edhe votimi nga jashtë vendit, një proces i ri që sjell sfida të natyrës teknike dhe organizative. U diskutua mbi sigurinë e dërgesave postare, verifikimin e të dhënave dhe garantimin e të drejtës së votës për diasporën shqiptare.

Në përmbyllje të takimit, drejtuesit e institucioneve vizituan Qendrën Operacionale të Kundër Krimeve Zgjedhore pranë KQZ-së, ku janë të pranishëm përfaqësues të SPAK dhe Prokurorisë së Përgjithshme – si një nyje bashkëpunimi e gatshme për të ndërhyrë në kohë reale për çdo problematikë që mund të lindë gjatë fushatës dhe ditës së zgjedhjeve.

Takimi sinjalizon një angazhim të qartë për një proces zgjedhor të pastër, të ndershëm dhe të mbrojtur nga çdo formë abuzimi.