Kryetari i bashkisë së Tiranës, Erion Veliaj zhvilloi sot një takim me disa sipërmarrës në zonën e Vorës. Veliaj ka theksuar se këto biznese shumë shpejt do të bëhen pjesë e Zonës së Lirë Ekonomike që po krijojohet në zonën e Kasharit dhe se kjo gjë do ta ndihmojë Vorën të marri një zhvillim të madh.Gjithashtu propozimi për bizneset do i shkojë qeverisë në emër të Shoqatës së Bashkive. Veliaj ka nënvizuar se për ata te cilët janë në gjurmët e ndërtesave te reja, do të veprohet njësoj si në Kombinat dhe “5 Maji”.

“Kemi të njëjtën situatë në Kombinat, ku shumica e kateve të para të ndërtesave të vjetra janë përshtatur si mjedise për shërbime dhe biznes. Propozimi ynë është: kush ka qenë biznes me numër NIPT-i, të trajtohet me hapësira të reja për shërbime. Ne do ta propozojmë si Shoqatë e Bashkive për të gjtiha bashkitë e prekura nga tërmeti. Nuk është një zgjidhje vetëm për Vorën, por vlen edhe për Kombinatin, Kinostudion, për Shijakun, Rrogozhinën, Thumanën, Krujën dhe Laçin,”

“Për ata që nuk u prekën nga tërmeti, por janë në gjurmët e ndërtesave të reja që po ndërtohen, do të veprojmë siç po bëjmë në Kombinat dhe “5 Maji”: shkëmbim për çdo metër katror. Pra, në vend që të bëjmë shpronësim, ne bëjmë shkëmbim. Nuk ka rëndësi nëse mjediset janë të legalizuara apo me hipotekë, por për sa kohë që je fakt aty, ne do të bëjmë shkëmbimin për metër katror. Sepse nëse je duke ndërtuar një lagje të re, por aty do lejosh çibanët e vjetër, praktikisht ia ul vlerën e pronës së re që po ndërtohet,” , shpjegon Veliaj.