Pas fjalimit të presidentit amerikan Donald Trump në Asamblenë e Përgjithshme të OKB-së, udhëheqësit arabë dhe myslimanë pritet të zhvillojnë një takim të posaçëm me të në Nju Jork, ku në qendër të diskutimeve do të jetë propozimi për krijimin e një force ndërkombëtare stabilizimi në Gaza, të mandatuar nga OKB-ja.

Plani, i cili gëzon mbështetjen e Francës dhe disa vendeve perëndimore që kohët e fundit kanë njohur shtetin palestinez, synon çarmatimin e Hamasit dhe kalimin e administrimit të Gazës nën drejtimin e një Autoriteti Palestinez të reformuar.

Ky skenar ka shkaktuar tensione të reja me Izraelin, i cili ka reaguar ashpër duke kërcënuar me aneksime të mëtejshme në Bregun Perëndimor. Trump, nga ana e tij, mbetet skeptik ndaj rolit të Autoritetit Palestinez, duke vendosur sanksione ndaj zyrtarëve të tij dhe duke ndaluar presidentin Mahmoud Abbas të mbajë fjalim në OKB.

Udhëheqësit arabë e konsiderojnë takimin si një mundësi kyçe për të bindur Trumpin mbi mbështetjen e planeve të Lidhjes Arabe për të ardhmen e Gazës. Në lojë është edhe një variant i hartuar nga një grup pune i udhëhequr nga Tony Blair dhe Jared Kushner, i cili fokusohet te rindërtimi dhe stabiliteti, por pa përcaktuar qartë një mandat afatgjatë për Autoritetin Palestinez.

Ndërkohë, burime diplomatike theksojnë se, ndryshe nga disa propozime që qarkullojnë në Uashington, asnjë nga këto plane nuk parashikon dëbimin masiv të palestinezëve – një ide që Trump herë pas here ka lënë të kuptohet se e sheh si opsion.