Një situatë interesante ndodhi gjatë një takimi të Kryeministrit Edi Rama me shtabin elektoral të Njësisë 1 në Tiranë, ku u shfaq një pyetje e papritur. Rama i drejtoi një pyetje ministrit të Brendshëm Ervin Hoxha në lidhje me origjinën e tij dhe lidhjet familjare me ish-diktatorin Enver Hoxha.

Rama e pyeti ministrin:
“Ti je këtu nga kjo zonë? Se ti origjinën e largët e ke andej… Se ty bufi të thotë nipi i Enver Hoxhës. Ore, edhe mund të ishe, s’ka ndonjë gjë.”

Në përgjigje, Ervin Hoxha sqaroi:
“Dëgjo, të lindësh diku dhe të kesh prindër ato që ke është një gjë që është fakt dhe nuk e ndryshon dot.”

Por, ai vazhdoi duke theksuar se babai i tij nuk ishte djali i Enver Hoxhës dhe se, në fakt, ai ndante më shumë lidhje me Musine Kokalarin, sesa me Enver Hoxhën:
“Babai im nuk është djali i Enver Hoxhës. Unë në fakt më shumë se me Enver Hoxhën bie kushëri me Musine Kokalarin.”

Pas kësaj, Rama i përgjigjet me një batutë:
“Po ç’doktor mo aman… se e ke ti atë të demokratit, jo liri demokraci…”

Përgjigjja e Hoxhës ka qenë:
“E di pse e kam o kryetar se kam qenë pjesë e administratës së tij. Po nuk i falet atij kur hyn te biografitë e të tjerëve. Dhe këtë ngatërresë e bën të qëllimshme. I falet tani se edhe mosha bën të vetën.”

Ky dialog mes dy liderëve shërbeu për të hedhur dritë mbi disa spekulime të opozitës, e cila vazhdimisht ka konsideruar Ervin Hoxhën si nip të Enver Hoxhës.