Ministri i Shtetit për Marrëdhëniet me Parlamentin, Taulant Balla, ka deklaruar se mazhoranca nuk diskuton vendimet e gjykatave, duke u referuar vendimit të Gjykatës Administrative për përjashtimin e deputetëve të opozitës. Gjatë një fjalimi në Kuvend, Balla theksoi se çdo çështje e ngritur lidhur me vendimet e gjykatave mund të ndiqet nëpërmjet rrugëve ligjore, por ai theksoi se Kuvendi duhet të kalojë në një proces normal punimesh.

“Përsa i përket vendimit të gjykatës administrative, e dëgjova Bardhin që iu referua këtij vendimi. Ju keni të drejtën tuaj të ndiqni çështjen në rrugë ligjore, por ne nuk diskutojmë vendime të gjykatave. Gjykata Kushtetuese ka thënë se vendimet e brendshme të Kuvendit nuk mund të ankimohen. Tani, duhet të hyjmë në një rrjedhë normale të punimeve të Kuvendit dhe të kalojmë në diskutimet e rendit të ditës,” tha Balla.