Në një konferencë për media, Ministri i Brendshëm Taulant Balla njoftoi se faza e parë e hartimit të ligjit për policinë e shtetit po përfundon. Ministri shprehu bindjen se ky ligj do të çojë në përmirësimin e trupës së policisë duke i hequr monopolin strukturës drejtuese.

“Ndryshimet mund ti përmbledhja ‘dinamizim, energjizim i trupës së policisë së shtetit dhe përmirësim të karrierës së policisë. Duhet ti japim mundësinë çdo punonjësi të policisë të bëjë karrierë. Ti japim fund monopolizimit të strukturës drejtuese brenda policisë së shtetit,” tha Balla.

Ministri informoi se në vitin 2023, 607 të rinj u pranuan në Akademinë e Sigurisë në nivelin bazë patrullë e përgjithshme dhe 41 prej tyre ishin të shquar në patrullën e krimit. Në vitin 2024, planifikohet pranimi i 400 kandidatëve të rinj, 100 prej tyre të shquar dhe 29 për funksione të veçanta në policinë e shtetit. Këto hapa janë pjesë e përpjekjeve për reformimin dhe përmirësimin e sistemit policor në Shqipëri.