Kryetari i Bashkisë së Himarës, Vangjel Tavo, ka reaguar pas urdhrit të kryeministrit Edi Rama, i cili kërkoi shkarkimin e nënkryetarëve të bashkive në rang vendi, në kuadër të masave për rritjen e efikasitetit në administratën vendore.

Por Tavo zgjodhi të mos ndjekë këtë direktivë. Në një prononcim për mediat, ai refuzoi zbatimin e urdhrit, duke theksuar se nënkryetarët e tij janë ende në periudhë prove dhe do të vlerësohen bazuar në performancën e tyre.

“Në varësi të performancës. Unë jam një kryetar i ri. Kuptohet që janë akoma në provë, plus që nënkryetarët e mi janë të rinj,” – u shpreh Tavo, duke e bërë të qartë se nuk do të ndërmarrë shkarkime të menjëhershme.

Qëndrimi i Tavos përbën një diferencim të qartë nga linja qendrore politike, duke sinjalizuar një qasje të kujdesshme në menaxhimin e ekipit drejtues të Bashkisë Himarë. Ky reagim vjen në një kohë kur qeveria është e fokusuar në riformatimin e administratës lokale dhe rritjen e përgjegjshmërisë së zyrtarëve vendorë.