Një ngjarje e rëndë ka tronditur qytetin Brest të Francës, ku një çift shqiptar u gjet i pajetë në apartamentin e tyre në adresën 101 Rue Général-Paulet, raportojnë mediat lokale.

Alarmi u dha rreth orës 16:30 nga një banor i lagjes Europe, i cili deklaroi se kishte dëgjuar dy të shtëna arme. Forcat e rendit mbërritën menjëherë në vendngjarje dhe gjetën Andon Janaqin, 36 vjeç, dhe Anjeza Zenelin, 30 vjeçe, pranë një arme gjahu. Hetuesit po e trajtojnë ngjarjen si vrasje e ndjekur nga vetëvrasja, duke sugjeruar se gruaja u qëllua fillimisht.

Çifti ishte prindër i dy fëmijëve, ndërsa në momentin e ngjarjes njëri prej tyre nuk ishte ende në shtëpi, dhe fëmija më i vogël ndodhej në shkollë.

Nëna e autorit, e cila ka qenë e tronditur nga ngjarja, deklaroi se nuk di asgjë për motivet dhe kërkoi që trupi i të birit të dërgohet në Shqipëri:

“Unë nuk di gjë. Të më sjellin trupin e djalit këtu. S’di gjë se çfarë ka bërë djali andej, ishin mirë e bukur, por nuk e dija që do të bëheshin këto vrasje”, – tha ajo mes lotësh.

Hetimet vazhdojnë për të zbardhur shkaqet dhe motivacionin e kësaj ngjarjeje tragjike, ndërsa komuniteti shqiptar në Brest mbetet i tronditur.