Partia e Lirisë ka deklaruar se incidenti fizik në mbledhjen e Këshillit Bashkiak Tiranë të hënën pasdite ishte një skenar i parapërgatitur për të shkaktuar gjakderdhje. Tedi Blushi, i cili u përfshi në një përleshje me Halit Valterin e PS-së, shprehu bindjen se gjithçka ishte planifikuar më parë.

“Ka qenë e planifikuar dhe është planifikuar që në atë seancë të kishte gjakderdhje. Këtë e them me bindje, sipas burimeve shumë të sigurta policore. Kryebashkiaku Erion Veliaj ka qenë i veshur me antiplumb dhe brenda në sallë ka pasur persona të armatosur dhe civilë,” tha Blushi.

Ilir Meta, duke mbrojtur Tedi Blushin, sulmoi kreun e SPAK dhe akuzoi Erion Veliajn për përfshirje në incidente të dhunshme. “Edhe analfabet të ishte, nëse do kishe një gram dinjitet, Erion Veliaj do të ishte në burg edhe vetëm për këtë shkresë. Se ti Ramoviçit nuk ke çfarë t’i bësh,” tha Meta.

Mbledhja e Këshillit Bashkiak të hënën dështoi pas tensioneve në sallë. Incidenti filloi kur Tedi Blushi hodhi një tufë me letra drejt Veliajt, duke shkaktuar më pas një përplasje fizike me Halit Valterin.