Detaje të reja kanë dalë në dritë për tentativën e arratisjes së Bledar Selmanajt nga burgu i Fierit. 43-vjeçari, i dënuar për vrasjen e mikut të tij, Xhulian Bullari, u përpoq të largohej gjatë orarit të ajrimit ditën e mërkurë, duke tentuar të kalonte rrethimin e institucionit.

Ky nuk është rasti i parë: Selmanaj ka tentuar dy herë më parë të arratiset. Në shtator 2021, ai u përpoq të largohej nga spitali i burgut në Tiranë, ku ndodhej për arsye shëndetësore, ndërsa pak javë më herët kishte tentuar vetëvrasjen gjatë qëndrimit në qeli. Burime nga drejtësia theksojnë se i dënuari ka pasur probleme të shëndetit mendor.

Vrasja e Xhulian Bullarit

Bledar Selmanaj u arrestua më 21 gusht 2021, katër ditë pas ekzekutimit të Xhulian Bullarit, 25 vjeç, në aksin Vlorë–Babicë. Viktima u gjet i pajetë brenda një makine Fiat Punto, ku, sipas ekspertizës, ishte qëlluar me tre plumba, një prej të cilëve në kokë, që i shkaktoi vdekjen e menjëhershme.

Hetimet zbuluan se shkak i krimit ishin pazaret e drogës. Selmanaj dhe Bullari kishin bashkëpunuar më parë në trafikimin e lëndëve narkotike, por marrëdhëniet u prishën për një borxh prej 3 mijë eurosh me euro false, lidhur me një marrëveshje për shitjen e rreth 100 kg hashash në Elbasan.

Policia ka hapur një hetim të ri për tentativën e fundit të arratisjes, ndërsa masat e sigurisë ndaj Selmanajt pritet të ashpërsohen.