Një tërmet i fuqishëm me magnitudë 6.8 ka goditur Marokun. Nga të dhënat e para bëhet fjalë për mbi 600 të vdekur dhe rreth 300 të plagosur. Lëkundjet e forta janë regjistruar me orën lokale në 23:11 të së premtes.
Epiqendra është lokalizuar në zonën qendrore të Marokut. Saktësisht ka qenë 16 kilometra pranë fshatit Tata N’Jakub të provincës Ighil, që ndodhet rreth 72 kilometra larg qytetit të Marakeshit.
Lëkundjet e forta janë ndierë në të gjitha rajonet e maleve Atlas, madje edhe në dy qytetet e mëdha Kazablanka dhe Rabat. Kohëzgjatja e tërmetit ka qenë rreth 30 sekonda.
Dëmet materiale janë të shumta. Raportohet për qindra ndërtesa të shembura dhe të dëmtuara.
Pamjet e frikshme nga tërmeti i fuqishëm në Marok
Pamjet që vijnë nga Maroku janë me të vërtetë të frikshme. Tërmeti që goditi vendin mbrëmjen e së premtes ka shkaktuar deri më tani mbi 600 viktima dhe mbi 300 të plagosur. Kështu raporton agjencia e lajmeve Reuters duke iu referuar televizioneve marokene.
