Një Tesla Cybertruck, e cila është e paligjshme për t’u drejtuar në Mbretërinë e Bashkuar, është sekuestruar nga policia në Mançesterin e Madh për shkak të mungesës së certifikatës së konformitetit dhe shqetësimeve të sigurisë.

Sipas mediave britanike, oficerët vunë re automjetin në Whitefield, Bury dhe ndaluan shoferin. Në një deklaratë në rrjetet sociale, Policia e Mançesterit (GMP) tha:

“Ndërsa kjo mund të duket e parëndësishme për disa, ekzistojnë shqetësime legjitime rreth sigurisë së përdoruesve të tjerë të rrugës ose këmbësorëve nëse ata ishin të përfshirë në një përplasje me Cybertruck”.

Policia konfirmoi se automjeti ishte i regjistruar dhe i siguruar jashtë vendit, por u konfiskua dhe shoferi, i cili është banor në Mbretërinë e Bashkuar, u raportua.

Tesla Cybertruck nuk i ka kaluar testet e sigurisë në MB

Cybertruck, i cili është ndërtuar me çelik rezistent ndaj plumbave, u lançua në 2019 dhe ka qenë në një turne promovues në Lindjen e Mesme dhe Evropë, duke përfshirë Festivalin e Shpejtësisë Goodwood në Mbretërinë e Bashkuar në vitin 2024.

Megjithatë, ky model ende nuk ka kaluar testet e sigurisë rrugore në Britani, duke e bërë atë të paligjshëm për përdorim në rrugët publike.

GMP bëri të ditur se ky rast i ishte referuar Operacionit Wolverine, një nismë e nisur në 2007 për të identifikuar shoferët që drejtojnë automjete pa siguracion. Pronari i Cybertruck do të duhet të provojë pronësinë dhe sigurimin e duhur përpara se automjeti të lirohet.