Në protestën e organizuar për vrasjen tronditëse të 14-vjeçarit Martin Cani, tezja e tij ka shpërthyer në lot, duke ndarë dhimbjen e thellë të familjes pas humbjes së të miturit. Me zemër të thyer, ajo u shpreh:
“E çuam në shkollë dhe jo në luftë që të na e therin. Nuk më gjen gjë. Gjithë bota ka mbajt zi për të, jo vetëm Shqipëria. Ç’më duhet uji, ka katër ditë që Martini nuk pi ujë.”

Fjalët e saj prekëse kanë prekur zemrat e të pranishmëve, duke reflektuar dhimbjen dhe revoltën e familjes për humbjen e nipit të saj, i cili u godit me thikë në zemër nga bashkëmoshatari i tij më 18 nëntor.

Gjatë protestës, dhimbja e madhe që ndjeu e bëri tezen të humbasë ndjenjat. Ajo u dërgua me urgjencë në spital nga një ambulancë e pranishme, për të marrë ndihmën e nevojshme mjekësore.

Protesta e zhvilluar nga familjarë, shokë dhe qytetarë të revoltuar ka pasur si qëllim kërkesën për drejtësi dhe rritjen e masave të sigurisë në shkolla, në mënyrë që tragjedi të tilla të mos përsëriten.