Ditën e djeshme, 51 shoqata dhe 50 personalitete të Diasporës dërguan një letër Kuvendit të Shqipërisë dhe kryeparlamentares Lindita Nikolla, duke kërkuar që të mundësohet vota e diasporës në zgjedhjet parlamentare të vitit 2025. Në letër, kërkohet veprim i menjëhershëm për ndryshimet e Kodit Zgjedhor për të lejuar votimin jashtë vendit.

Letra thekson se është koha për veprime urgjente për të plotësuar detyrimet kushtetuese për votimin e shqiptarëve jashtë Shqipërisë. Ata gjithashtu përmendin vendimin e Gjykatës Kushtetuese, që ka urdhëruar Kuvendin për të plotësuar boshllëkun ligjor brenda një viti.

Shoqatat dhe personalitetet e Diasporës shprehin gatishmërinë e tyre për të ndihmuar në procesin e ndryshimit të ligjit dhe theksojnë se vota e diasporës do të fuqizonte demokracinë shqiptare. Ata shprehin shqetësimin për mungesën e vëmendjes ndaj kërkesave të diasporës për të qenë pjesë e vendimmarrjes në vend.