Kreu i Grupit të PD-së, Gazment Bardhi, i ka kërkuar dorëheqjen e Elisa Spiropali nga posti i kryetares së Kuvendit pas vendimit të Gjykatës Administrative, e cila shfuqizoi vendimin për përjashtimin e deputetëve të opozitës. Bardhi e ka cilësuar vendimin e Kryetares së Kuvendit si një shkelje të rëndë të Kushtetutës dhe ka denoncuar trajtimin e deputetëve demokratë, të cilët, sipas tij, u penguan të hynë në Kuvend me forcë dhe bllokim të dyerve me kangjella hekuri dhe prezencën e forcave të sigurisë.

“Duhet të dorëhiqeni, nuk keni lejuar opozitën të marrë pjesë në seancë në kundërshtim me vendimet e Kushtetueses. I vendosët deputetëve kangjella hekura e forca sigurie. Futët edhe forcat speciale për të ndaluar deputetët të futen brenda në Kuvend,” tha Bardhi, duke e quajtur këtë veprim një shkelje flagrante të ligjit.

Në një akuzë të ashpër, Bardhi u shpreh se Elisa Spiropali përfaqësonte “kriminelët” dhe se ishte koha që ajo të largohej nga pozita e saj. “Ti atje lart në majë, që je përfaqësuese e kriminelëve, duhet të dorëhiqesh. Nxirr Gardën jashtë. Duhet të ndjeni turp bashkë me zonjën e vezëve. Duhet të jepni dorëheqjen,” tha ai, duke shtuar se ajo nuk mund të vazhdonte të qëndronte në krye të Kuvendit pas një akti të tillë që, sipas tij, kishte degraduar institucionin dhe po shkaktonte një “regjim kriminal”.