Aleanca LGBTI, së bashku me disa organizata të grave, grupe liberale dhe promovues të të drejtave të gjinive alternative, kanë dalë në mbrojtje të kreut të grupit parlamentar të Partisë Demokratike, Gazment Bardhi, pas përplasjes së fundit me deputeten socialiste Zegjine Çaushi.

Në një letër drejtuar Byrosë së Kuvendit, këto organizata kërkojnë marrjen e një mase disiplinore ndaj deputetes Çaushi, duke argumentuar se ajo përdori gjuhë fyese dhe denigruese gjatë seancës parlamentare, një sjellje që sipas tyre përbën shkelje të etikës parlamentare dhe nuk mund të trajtohet më me masa të lehta.

Debati mes palëve nisi në seancën plenare të 19 shkurtit, kur deputetja socialiste iu drejtua Bardhit duke i kujtuar rezultatin e dobët që Partia Demokratike mori në Qarkun Fier në zgjedhjet parlamentare të 11 majit, ku ai ishte Drejtues Politik. Gjatë fjalës së saj, Çaushi tha:

“Ti je një njeri që vetëm për t’u përdredhur erdhe në Fier, me atë trupin tënd si purtekë domatesh.”

Deklarata nxiti reagimin e organizatës LGBTI dhe 16 organizatave të tjera, të cilat kërkojnë nga institucionet parlamentare të mbrojnë figurën e Bardhit. Përplasjet mes Bardhit dhe Çaushit kanë nisur që gjatë fushatës për zgjedhjet e 11 majit dhe kanë vazhduar në sallën e Kuvendit, ku debatet kanë kaluar në akuza personale dhe replika ironike.

Që nga ajo periudhë, organizatat e shoqërisë civile po kërkojnë masa për parandalimin e sjelljeve fyese në institucionet publike dhe respektimin e etikës parlamentare.