Nga nesër, Tirana do të jetë mikpritëse e takimit të 51-të të Konferencës Rajonale Europiane të INTERPOL-it, që do të zgjasë për tre ditë. Lajmi është bërë i ditur nga vetë INTERPOL përmes një postimi në platformën “X”.

Ky vendim u mor nga komisioni i politikës së jashtme të INTERPOL-it gjatë muajit maj, dhe është hera e parë që Shqipëria pret një konferencë të tillë.

Sekretari i përgjithshëm i INTERPOL-it dhe delegacione nga vende të ndryshme kanë mbërritur tashmë në Tiranë. Organizimi i kësaj ngjarjeje është mbështetur nga Ministria e Brendshme e Shqipërisë, dhe ministri Taulant Balla ka nisur takimet me delegacionet.

Gjatë konferencës, do të diskutohen çështje të rëndësishme lidhur me krimin, duke përfshirë trafikun e drogërave, krimin e organizuar dhe krimin kibernetik. Shqipëria, së bashku me INTERPOL-in, ka qenë e përfshirë në disa operacione të rëndësishme kundër këtyre formave të krimit, dhe pritet që ky takim të forcojë më tej bashkëpunimin ndërkombëtar në këto fusha.