Një ngjarje e rëndë është shënuar mbrëmjen e sotme në Tiranë, ku një 81-vjeçar është gjetur i pajetë në banesën e tij nga i biri.
Sipas njoftimit zyrtar të Policisë, dyshohet se i moshuari është vetëvrarë me një mjet prerës.

Ngjarja ka ndodhur rreth orës 20:05 në rrugën “Ferdinand Paparisto”, ku shtetasi A. Gj. njoftoi Policinë pasi kishte konstatuar babain e tij, R. Gj., pa shenja jete në shtëpi.

Menjëherë në vendngjarje mbërritën shërbimet e Policisë dhe grupi hetimor, të cilët po punojnë për zbardhjen e plotë të rrethanave të ngjarjes, ndërsa trupi i viktimës do t’i nënshtrohet ekspertizës mjeko-ligjore.

Policia ka bërë të ditur se të gjitha pistat janë të hapura, ndërsa paraprakisht dyshohet për vetëvrasje.