Një i mitur 15-vjeçar është arrestuar nga Policia e Tiranës pasi u kap duke qarkulluar me armë zjarri dhe dorezë metalike në zonën e Fushë-Mëzezit.

Shërbimet e Komisariatit të Policisë Nr.6, pas informacioneve të siguruara në rrugë operative, organizuan një operacion të menjëhershëm që çoi në kapjen në flagrancë të të miturit me inicialet A.K., banues në Tiranë.

Gjatë kontrollit fizik, policia i gjeti dhe i sekuestroi në cilësinë e provës materiale një armë zjarri dhe një dorezë metalike (përforcues grushti).

Materialet procedurale janë referuar në Prokurorinë e Juridiksionit të Përgjithshëm Tiranë për veprime të mëtejshme ligjore. Policia vijon hetimet për të zbuluar origjinën e armës dhe rrethanat që e kanë çuar të miturin në posedim të tyre.