Një 38-vjeçar është proceduar në gjendje të lirë nga Policia e Tiranës, pasi akuzohet për përfshirje në dhunimin e Krist Fufit, djalit të ish-deputetit demokrat Mhill Fufi. Ngjarja ka ndodhur mbrëmjen e 25 prillit, në një rezidencë në zonën e Farkës.

Sipas burimeve zyrtare, shtetasi me inicialet K. S., në bashkëpunim me persona të tjerë ende të paidentifikuar, ka goditur me grushte dhe ka kanosur të riun 19-vjeçar, i cili aktualisht ndodhet nën kujdesin e mjekëve në spital për shkak të plagëve të marra.

Hetimet paraprake tregojnë se disa persona, të cilët kanë mbërritur me një automjet pranë lokalit ku ndodhej Krist Fufi, kanë marrë nga bagazhi shkopinj dhe mjete të tjera të forta, dhe më pas kanë hyrë në ambientet e brendshme për ta kërkuar. Pasi e kanë gjetur, e kanë goditur brutalisht, duke i shkaktuar dëmtime të shumta në kokë dhe trup.

Ndërkohë, dyshohet se një nga autorët ishte i armatosur me armë zjarri, megjithatë nuk ka prova që ajo të jetë përdorur gjatë incidentit.

Policia e Tiranës vijon hetimet për identifikimin dhe kapjen e personave të tjerë të përfshirë në këtë ngjarje.