Policia në Tiranë ka vënë në kërkim një 19-vjeçar pasi kishte përshtatur një qendër masazhesh për veprimtarinë e kundërligjshme të prostitucionit. Në pranga janë vënë menaxherja e qendrës së masazheve së bashku me një punonjëse, ndërsa janë proceduar penalisht 3 shtetas të tjerë.

Specialistët e Seksionit për Hetimin e Trafiqeve të Paligjshme, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, në vijim të punës për goditjen e paligjshmërisë, pas një pune të mirëfilltë hetimore disamujore, organizuan dhe finalizuan operacionin policor të koduar “Fusion”.

Në njoftim thuhet: “U arrestuan në flagrancë shtetaset M. K., 26 vjeçe, (menaxherja) A. B., 19 vjeçe, (punonjëse). U proceduan në gjendje të lirë shtetaset R. S., 28 vjeçe dhe K. K., 19 vjeçe, punonjëse në qendrën e masazheve, dhe shtetasi D. O., 49 vjeç, banues në Tiranë; u shpall në kërkim shtetasi M. M., 19 vjeç”.

Gjatë hetimeve është zbuluar se qendra e masazhit, e menaxhuar nga 26-vjeçarja, ishte regjistruar ligjërisht si qendër masazhesh, ndërsa ushtrohej prostitucioni. Materialet janë dërguar në Prokurori për veprime të mëtejshme procedurale.