Në Tiranë po mbahet konferenca e tretë e Samitit të NATO-s për Mbrojtjen Kibernetike, ku marrin pjesë kryeministri Edi Rama, sekretari i përgjithshëm i Aleancës, Mark Rutte, si dhe ekspertë e përfaqësues të lartë nga vendet anëtare dhe partnere të NATO-s.

Në fjalën e tij, Mark Rutte theksoi rëndësinë e sigurisë digjitale në një kohë kur sulmet kibernetike janë kthyer në kërcënim real për sigurinë kombëtare të vendeve:

“Sot tastiera është një armë lufte që shënjestron shoqëritë tona. Aktorë shtetërorë e jo shtetërorë po punojnë kundër nesh. NATO po bëhet gjithnjë e më e fortë në hapësirën digjitale, dhe kundërshtarët tanë e dinë se neni 5 mund të aktivizohet edhe nga një sulm kibernetik,” – deklaroi ai.

Masat e Policisë

Në kuadër të zhvillimit të këtij samiti në Pallatin e Kongreseve, Policia e Shtetit ka ndërmarrë një plan të posaçëm masash për të garantuar rendin dhe sigurinë publike.

Sipas njoftimit, janë vendosur kufizime të qarkullimit në disa zona kyçe të kryeqytetit:
• Nga semafori pranë Presidencës deri te sheshi “Nënë Tereza”, përfshirë edhe bulevardin “Dëshmorët e Kombit”;
• Rruga “Gjergj Filipi” dhe aksi që lidh hotel “Marriott” me bulevardin kryesor;
• Për këmbësorët, do të jetë i bllokuar trotuari nga hyrja e hotel “Rogner” deri te Pallati i Kongreseve.

Kufizimet janë në fuqi nga ora 07:00 e datës 9 tetor deri në 15:00 të datës 10 tetor 2025.

Policia e Tiranës u bën thirrje qytetarëve për bashkëpunim dhe mirëkuptim, duke i ftuar të shmangin lëvizjet e panevojshme dhe të respektojnë udhëzimet e forcave të rendit në terren.

☎️ Për çdo nevojë ose ndihmë, qytetarët mund të kontaktojnë në numrin pa pagesë 112.