Policia e Tiranës ka finalizuar me sukses operacionin e koduar “Strategjia”, duke goditur një grup kriminal të specializuar në vjedhje banesash. Operacioni u zhvillua nga specialistët për Hetimin e Krimeve të Komisariateve të Policisë Nr. 2 dhe Nr. 3.

Si rezultat i hetimeve intensive, u arrestuan tre pjesëtarët e grupit: A. M., 36 vjeç, S. T., 35 vjeç dhe G. K., 38 vjeç, të tre persona me precedentë penalë të mëparshëm për të njëjtën vepër penale.

Nga veprimet hetimore dyshohet se shtetasit, të organizuar si grup, kanë kryer të paktën tre vjedhje gjatë muajit janar. Konkretisht, më 7 janar kanë vjedhur një banesë në rrugën “Don Bosko”, më 10 janar kanë marrë 14 mijë euro dhe sende me vlerë nga një banesë në rrugën “Dritan Hoxha”, ndërsa vjedhja e tretë është kryer një ditë më parë, sërish në rrugën “Don Bosko”.

Sipas Policisë, skema e veprimit të grupit ishte e mirëorganizuar. Fillimisht, autorët fotografonin bravat e dyerve të banesave, më pas pamjet analizoheshin për të zbërthyer mekanizmin e tyre, duke mundësuar hapjen me çelësa universalë.

Policia bën me dije se vijojnë hetimet për zbardhjen e vjedhjeve të tjera që mund të jenë kryer nga ky grup kriminal. Materialet procedurale i janë referuar Prokurorisë së Tiranës për veprime të mëtejshme ligjore.